Archive | સુરેશ દલાલ RSS feed for this section

તમે વાતો કરો તો થોડું સારું લાગે

20 મે

તમે વાતો કરો તો થોડું સારું લાગે,
આ દૂરનું આકાશ મને મારું લાગે.

વૃક્ષો ને પંખી બે વાતો કરે છે,
ત્યારે ખીલે છે લીલેરો રંગ.

ભમરાના ગુંજનથી જાગી ઊઠે છે,
ફૂલોની સૂતી સુગંધ.

તમે મૂંગા તો ઝરણું પણ ખારું લાગે,
તમે વાતો કરો તો થોડું સારું લાગે.

રોમાંચે રોમાંચે દીવા બળે,
અને આયખું તો તુલસીનો ક્યારો.

તારી તે વાણીમાં વ્હેતો હું મૂકું છું,
કાંઠે બાંધેલો જનમારો.

એક અમથું આ ફૂલ પણ ન્યારું લાગે,
તમે વાતો કરો તો થોડું સારું લાગે.

સુરેશ દલાલ

સૌજન્ય : ગાગરમાં સાગર
http://urmisaagar.com/saagar/?p=114

Advertisements